Nederlandse Liederenbank


Vo[x]se mon oe[d]e [=verle] Hoort ghy dochters en gesellen Wie ghy syt jonck ofte out Die v tot vryen wilt stellen En soe garen waert gehoudt En stelt v herten niet soo seere Nae gelt en goet Maer voor al soeckt deucht en eere Wat ghy doet Gelt en goet siet men nu vryen Voorwaer meer als den persoon Eer en duecht stelt men ter syden Die Gelt heeft die spant den croon Die nu het meeste heeft te bieden Met bewys Dat sietmen alledaegs Geschieden Windt den prys Comt daer een jonckman ter baenen Die hem wat tot vryen stelt Teerste datmen hoort vermanen Oft hy heeft middel van Gelt Ten baet geen liefde noch geen wille [L]ieget hem best Hy krycht terstont syn apostille Nihile opt request Maer coomt daer een ingetreden Die Gelt heeft in syn comptoir Die contant heeft te besteden Terstont krycht hy Goet gehoor Tis al met stuypen en buygen Coomt in monseur Hy sal terstont de dochter crygen Door Gilis [s]acuer Gelt en goet sietmen nu vryen Bouen eer en goede faem Tis al eens hoement gaet crygen Die gelt heeft is aengenaem Tis nu al eens van want religie Hoemen is Gesindt Die van gelt heeft dbeste provisie Wort bemindt Eertyts hadmen goet behagen In eerdeuch en goet geslacht Daer naer hoertmen niet meer vragen Die gelt heeft die is geacht Al had een jonckman goede intenty Wyscheyt en verstant Hy krycht voorwaer geen audienty Heeft hy geen contant Ghiericheyt boos van naturen Wat hebt ghy al quaet gebaert Dat daer soe menich goet partaren Blyft gescheyden ongepaer En dat al om een cleyn geschille Al om een hant vol gout Blyue daer nu tegens haer wille Ongehout Men plach voor gemeen te sprecken Dat de lieffde het al vermocht Maer nu vintmen vremde treecke Dat de lieffde wort met gelt gekocht Men mach voorwaer nu niet meer singen Dat lieffde verwindt Want dat gelt doet wonder dingen Maeckt lieffde blynt Oerloff dochters en gesellen Wie ghy syt arm ofte rycke Als ghy v tot vryen wilt stellen Souckt altoos naer v sgelyck En stelt v herte niet soe seer Naer gelt en goet Maer vooral souckt deucht en eere Wat ghy doet

Handschrift Ariaenke de Gyselaer
1600-1602
Rotterdam, Gemeentebibliotheek, 96 E 13
f16v

Willem Kuiper, naar bron, kritisch.