Nederlandse Liederenbank


op de wijse: alst begint 1. Gelijck als die witte swaene sterft en sinck een droevich liet soe moet Ick eylaes voertaene singen Dit In mijn voerdriet Oe felle doet wilt mijn niet spaere Duer straelt mijn soe bey allaes van paere bevrijt van pijn. 2. Wie sit gij die Daer minne gij quetst mijn hert van binne Ick bidt u mijn voerklaert Konst Ick weeten u sinne Konfoert sou Ick gewinne tmoet u sijn geoepenbaert Om hulp roup gij die Doet Sou die doer Uwen noet Weesen een meloesin. sertein u lijden groet soude Dan voerdubbelt sijn. 3. Sou Ick om den doet niet roepen gij en acht niet op mijn pijn met mijn bloet moet Ick u koepen als pieraemes deede fijn Want gij en acht niet op mijn lijden twelck Is groet Als Ick truer soe sijt gij blijde Lief mijn Joet 4. Stout sijt gij Int begeeren gij gaet mijn moelesteeren Met u woerden dit wel voersint gij Jongelinck vol eeren Secht mijn sonder sesseeren Waer toe gij mijn bemint Man vindt er meer dan mijn die daer een meedoesin haer minnaers sin getrou hier om soe raet ick u Kiest voer mijn een ander vrou. 5. Of daer stont een hof vol blomme en daer In stont exsoelent In mijn sin seer uitgenoemen Geen schoender stont daer ontrent welck van alle sout gij plucken antwoert vrij Deese vraege wilt ondecken liefste mijn. 6. Liefelick heit vol treeken bij u mijn lief geleeken noeit en hoerde Ick sulcken vraech tanwoert salt niet aen breeken die waerheit sal ick spreeken naede beste Ick altijt haeck al valt mijn pijne swaer De beste soude Ick klaer t plucken metter daet Dander sou Ick eenpaer laete staen, nu tantwoert vaet. Ick danck u prinsesse reine Dat die vraech gesalleveert gij sit die blom die Ick meine Die van mijn meest wort geëert Want geen schoender In mijn sinne Stont Int hof Kon Ick u Int ent noch winne godt hebt lof. 8. Prinsesse lief getrouwe Voer u geen ander vrouwe nu ter tijt laet sin bemint naest godt wilt op mijn bouwen Soa sal Ick Jonge vrouwe troesten u diet wel voor sint op hoepe leef Ick voertaen quae klappers laet die gaen Geduldich sit voer al Ick hoep dat godt seer ssen ons te saemen vougen sal.

Liedbundel van Antonis van Butevest
[1590 ca.] [na 1594]
Leiden, Gemeente-archief, Gildenarchief no. 1474
f100r

Afschrift Meertensinstituut (verm. door C.C. Vlam), naar bron, diplomatisch.