|
|
|
Een nieu liet alst begint.
1. Cornelyae wilt toch eens drae
mijn u dienaer troest geven
waer Ick lech off stae vroech ende spae
es mijn hert u beneeven
met liefde ben ick duerwont
Dat heeft gedaen u rooder mont
dies Ick nacht noch dach en rust
om dat nae mijn lust
u schoen maeget mach genaken
dat gij mijne liefde blust
die gij doet soe vierich blaeken
waer Ick, doch van u gekust.
2. Kessels geslacht gij hebt die macht
wilt u tminwaerts voervveeren
Op mijn woert acht doer liefien kracht
Zal Ick u altoes eeren
en constant getrouwe sijn
ontfangh mijn In u armkens fin
die als snee wit sijn en schoender
Gelick Is u eedel persoene
volmaeckt In gemeins soekondich
die gij verre spant de kroen
van die Ick oeit sout hertgrondich
willen kiesen mijnen loen.
3. Lenaerten sal hier In dit dal
doch anders geen beminnen
off doer misval bitter als gal
sal hem die doet voerslinnen
Vant u persoens Is sin begeert
anders niet als op duecht en eer
hij heeft sin hert op u gestelt
dus hem troest geeft niet meer en quelt
Soe mach hij doer lieft eendrachtich
eens met u werden voerstelt
Daer toe hij aen roupt aendachtich
die sulcks heeft in sijn gewelt
4. Stoeters prinses sal sijn maetres
Geduerich liefde dragen
Tsy waer sij Is die schoene daer
Sal altoes nae haer Jaegen
om tgeen sij voer hem heeft voerklaert
en dat sij Is meer prijsen waeert
Zal hij haer dienen met oetmoet
en presenteren haer tot lljf en goedt
alle dat In sijn voermoegen Is
comen mach in lijf en bloet
Daer mee sij haer sal genougen
hoop Ick die nimphe soet.
Liever te sterven
Dan haer te derven. | |
|
|
Liedbundel van Antonis van Butevest
|
|
[1590 ca.] [na 1594]
|
| Leiden, Gemeente-archief, Gildenarchief no. 1474 |
| f74v |
|
| Afschrift Meertensinstituut (verm. door C.C. Vlam), naar bron, diplomatisch. |
|
