|
|
|
Een Nieu liedeken vande Belegheringhe ende bestorminghe van Vreborgh ende het Slot tot Utrecht.
Wie wil hooren een Nieuw Liet
Dat sal ick u singhen
Watter cortelinghen is gheschiet
Dat sal ick u volbringhen
Vande Spaengiaerts alghemeen
Zy waren op Vreborch groot en cleen
Zy wilden den haen gaen maken
Zy meenden wel te krijghen buyt
Maer sy moesten ter Poorten uut
Hoe sullen zy in Spaengien raken.
Zy maeckten daer soo groot gheclach
Sy comen onnoosel kijcken
Sy quamen op sint Thomas dach
Uut, met roers en met pijcken,
Sy liepen van Vreborch seer verstoort
Sy meenden te doen een wreede moort
Omtrent ten twaelf uren
Sy branden sint Catrijnen poort
Maer God danck, ten ginck niet voort,
Ten mocht haer niet ghebeuren.
Dit sach soo menich jongher Helt
Die hebbent soo saen vernomen
Sy hebben die schiltwacht uutghestelt
Sy zijn teruggh ghecomen
Die spaengiaerts schoten so menigen schoot
Soo dattet die Burghers hebben ghehoort
Sy waren ter Tafelen gheseten,
Mans, Wijfs, kleyn ende groot
Doen Utrecht was in groote noot
Sy hebben den hongher vergheten.
Die Burghers worden in orden ghestelt,
Teghen de spaengiaerts vals van gronden,
Sy schoten so menigen schoot met gewelt
In alsoo corter stonden:
Sy hebben geschoten de Kerck in sticken
Sy gingen thuys wel dapper opschicken,
S. Mariens Toren is onder gevallen
S. Jacobs Toren soomen siet,
Die staet soo zwack gelijck een riet,
Men siet die Clocken allen.
Die borgers quamen gelijckerhant,
Zy wilden tesamen stormen,
Zy brochten gheschut aen eenen kant
Die spaengiaerts doken als wormen,
Zy hebben daer soo dapper gheschoten
So dat het de spaengiaerts heeft verdroten
Zy ghinghen parlementeren
Zy gavent op al met der spoet
Om te behouden Lijff en goet
Uut te trecken met haer gheweeren.
Het ghebeurde op eenen Manedach
Dat die Spaengiaerts uuttoghen,
Zy trocken uut met al haer macht,
Alsoomen sach voor ooghen
Soo menighen Burgher die dit saghen
Daer quamen sevenentwintich waghen
Die moesten haer bagagie voeren,
Sy moesten al te voete gaen,
De Spaengiaerts spraken niet te verstaen
Met haere Spaensche Hoeren.
Vierentwintich van tweehondert uut Vreburch quam
De eerste was Madama vrou vuylen
De een was kreupel, d'ander was lam,
Den derden begost te muylen,
Zy moesten t'Cruys helpen draghen
Veel wasser met S. Job gheslaghen:
Te waghen moestmense vueren,
Die Spaengiaerts volchden van achter aen
Nae de Cathuysers zijn sy ghegaen,
Utrecht was in rueren.
Oorloff ghy Borghers goet,
Dit is tot uwer eeren
Danckt den Heer al met der spoet
En den Edelen Prins loeft seere,
Met de Heeren van der Stede,
Knechten end Gouverneur [mede]
Loeft die Heer der Heeren
Verblydt u nu in desen tijt,
Ghy zijt nu vande Spaengiaerts bevrijt
Die u benouwen seere. | |
|
|
Een Nieu Geuse Lieden boecxken/ Waer inne begrepen is den gantschen Handel der Nederlantscher geschiedennis/ [sic] dees voorleden thien Jaren tot noch toe toeghedragen/ eensdeels onderwijlen in Druck wtgegaen/ eensdeels nu nieu byghevoecht. Midtsgaders sommighe schoone Refereynen/ ten seluen Propooste dienende/ hier achterbyghestelt. Nu nieuwelick vermeerdert/ ende ghecorrigeert. Pro Lege, Rege, & Grege. [houtsnede 'Viue le Gues'] Viue Dieu, La Santé du Roy, & la Prosperitè [sic] des Geus.
|
|
[1578?]
|
| Parijs Bibliothèque Nationale: Rés. p. Yi 24 |
| f104r |
|
| DBNL, naar Kuiper & Leendertz 1924. |
|
