|
|
|
Een nieu Liedeken, op de wijse, Coekelecoeck soo seet mijn Haen.
Ontwaect nu tsamen over al
Erm, rijck, groot ende cleene,
Ceres die gheeft sonder ghetal
Haer vruchten int ghemeene,
Dies menich Huysman is verblijt,
Rijckdom bedanckt hem vanden tijt,
Men is veel sorghen gheworden quijt,
Al heeft een ander haet en nijt.
Augustus sidt nu onversaecht
Als een gheweldich heere,
Gheruste bate niet en claecht,
Maer gheeft hem prijs en eere,
Men mach wel prijsen den goeyen oost
Die nu seer menige heeft getroost,
Dus laet ons blijven by sulcx propoost
Augustus eeren als een provoost.
Al is Moutvlieghe sonder gelt,
Hy derf noch vry wel borghen,
Als Waechals is gheleghen int velt
En derf voor tbroot niet sorghen,
Al ist mijn oom oock noch soo leet
Cleijn schaemte en riect niet seer na tsweet
Dus sietmen al wijt end breet,
Elk is tot zijnen dienst bereet.
Rethorices beminder goet
Wilt oock nu vruecht hanteren,
Midts dat Augustus lieflijck doet
De menighe triumpheren,
Vrolijck accoort is oock verfraeyt,
Der vruechden saet wort nu ghesaeyt,
Seer wel nu de fortuyne draeyt
Elc met Augustus wort gepaeyt.
Prinche.
Reyn Princhelijcke heeren Jent
Dit is tot uwer eeren,
Tis liefd die ons hier toe went
Willet int beste keeren,
Twort vant vreuchden bloemken ghedaen
Rethorica geeft ons tvermaen,
Wilt dit van ons in danck ontfaen,
Tot uwen dienste dat wy staen.
Der vruechden Bloeme.
Per Berghen op Zoom, 1561. | |
|
|
Vreugenbloem (Bergen op Zoom) (rederijkerskamer),
Een nieu liedeken, op de wijse, coeckelercoeck soo seet mijn haen...
|
|
1561
|
| Brussel KB: II 13.368 C 56 |
| plano |
|
| Simon Groot, naar bron, kritisch |
|
