|
|
|
Een ander liedeken
Gelyck een casteel / twelck staet geheel
Rontsom met bolwercken vast gebouwt
Tegens syn vianden / hem bewaert te lande
End alleen opt syn stercte betrouwt
En tryumpheert op syn manieren
Met vaendels begeert hem te vercieren
Sonder alle vreesen van dangieren
Met verachten / vande machten / syns vyandts
Doen was all myn weesen geheel sonder vreesen
Als ick myn soo haestich belegert sach
Met alle die hayercrachten va<+n> Cupidoos machte
Die nyemandt ter weerlt wederstaen en mach
Myns lieffs deuchden goet dat waeren die knechten
En haer wesen soet tgeweer om vechten
Van haer schoonheyt sy tvaendel oprechten
Die slachoorden stout int woorden van Cieraet
Tlieffelyck aenschouwen van dees schoone vrouwen
Waeren haere Cartouwen en geschut
Daermede dat sy velden / alle de gewelden
Mynder bolwercken gantsch onnut
Tsoete geclanck van myn lieffs woorden
Den allarm sanck met soeten accoorde
Om op my te doen den storm discoorde
Maer eylacy ick badt om spaty tot accoort
Ick wil v opgeuen / lyff / goet / ende leuen
Alderliefste lieueken heel in v hant
Sonder v te setten maeten ofte wetten
Ick geue v de victorye tryumphant
Door v graty goet wil myn salueren
Soo sal ick met voorspoet den loff vermeren
Van v goetheyt tot grooter eeren
En met prysen jonst bewysen tuwer deucht | |
|
|
Album amicorum van Aefgen Claesdochter van Giblant
|
|
1598-1600
|
| Den Haag KB: 135 K 36 |
| f96v |
|
| Willem Kuiper, naar bron, diplomatisch. |
|
© 2024 KNAW/Meertens Instituut
