Nederlandse Liederenbank


Een liedeken op de wyse van Nero moordadich etc Met swaer versuchten ende inwendich treuren moet ick nu vluchten ende den doot beseuren tgewelt dat my geschiet dat doet my treuren en brengt my int verdriet tot alder vueren Myn selffs wille en kan ick nyet volbrengen door haer geschille die nyet en willen hengen nochtans hoop ick int ent my te vermengen met v in lief den jent sonder verlengen Ick bens onschuldich dus lieff wilt mynt nyet wyten t hart sorvuldich sal syn beloften wel quyten tot synder tyt voorwaer al soudt hen spyten Dus lieff laet lieffde eerbaer alsoo nyet slyten Lieffde warachtich en sal dat nyet gedoogen dat yemant crachtich myn hert sal steelen moogen dat tot v lieff alleen heel es geboogen dus peynst niet liefste reen te syn bedroogen Prince Schoone karsouwe princesse lieff vol eeren wienst geest getrouwe myn hert oyt ginck begeren verbeyt met uwen knecht wilt v verneren dat bid ick v oprecht den tyt sal leeren. Tuschen lieffden fyn En behoort geen nydich hert te syn D.D.

Album amicorum van Aefgen Claesdochter van Giblant
1598-1600
Den Haag KB: 135 K 36
f79v

Willem Kuiper, naar bron, diplomatisch.