Nederlandse Liederenbank


Een niew liedeken alsoot begint O roosken root / o parele Jent O lief mynioot / daer ick om lyde torment O schoon goddinne ick blyue geschent Want al myn lyden is sonder endt Nacht ende dach / doen ick geclach / voorwaer Om dat ick moet scheyden van v / [o] maecht eerbaer Moet ick dan scheyden / ist nu den tyt Sonder verbeyden / ofte respyt Myn hart van droefheyt int lichaem splyt Myn oochskens ick aen stuckken kryt O scheyden fel / d[at] my geqwel doet aen Ick en weet niet hoe dat ickt sal connen bestaen O wreeden dach / ongeluckkich uer Dien ick oyt sach / gy valt my soo suer Want het dunckt my te weesen tegen die natuer Dat ick nu moet o maechdeken puer Seggen adieu op een nieu tot u O bittre doot waer na so beyt ghy nu Princesse schone / dit wel[-le] versint Gy spant die croone / en syt bemint Want ick ben niet gelyck die wint Gy staet altyt in myn harte geprint Jck sal getrou / o schoon Jonck vrouw / V zyn Al valt my tscheyden also grooten pyn Liefs gesichte te deruen is swaerder als steruen anno 1598 Hendrick Janssoon Wou

Album amicorum van Aefgen Claesdochter van Giblant
1598-1600
Den Haag KB: 135 K 36
f6v

Willem Kuiper, naar bron, diplomatisch.