|
|
Mijn hertze en can verbliden niet Als soe niet vroilic up mi ziet In wien ic vruechden aen bespiet Elpt mi of ic verderve
Mi ne can gehelpen wijf no man Als soe mi geenre hulpe ne jan Ic moet van rauwen dwinen dan Et es aldus mijn erve
Mijn lief es leet mijn heyl verdriet Aldus ende wers es mi ghesciet Ic biddu vrauwe ghedinct mijns yet Eer ic van rouwen sterve
Meerre vruecht nie man ghewan Als ic u vroylic scauwen can In can ghesceiden niet daer van Eenparich ic mi kerve
Met vruechden zinghen een vroylic liet Allen rouwe van mi vliet In hopen wes ghi mi ghebiet Elpt mi of ic bederve
Mijn hertze en can verbliden niet etc. | |
|
Gruuthuse-handschrift
|
1390 - 1400
|
Koolkerke (thans Den Haag) |
f13v |
|
Johan Oosterman en Corrie de Haan, naar Heeroma 1966 en bron, diplomatisch. |
|
© 2024 KNAW/Meertens Instituut