|
|
|
Een nieuw Liedeken.
Lof si u god voor alle saken
Wiens goetheyt ic moet smaken
Want lieffelijck in elcx aenschouwen
Hebt ghi de eerde willen maken
Waer door dat nu gheraken
Aent voetsel soet tblijct mans en vrouwen
Lof die de dierkens wel cont onderhouden
Alleen o Heere door u stercke hant
Lof die de scoon landouwen
My veel vruchten reijn beplant
Wijn en coren abundant tgroeyt al tot ons behoet
Lof eere an elcken kant
Sy u mijn schepper soet
Om d' Elementen goet.
Lof crachtich God reyn van manieren
U moet ick obedieren
Die ons u graci wildet schincken
Lof die daer schiept in dees duwieren
Fonteynkens en Riuieren
Op dat elck soude mogen drincken
Al watmen hier soude connen ghedincken
Crijght sijn virtuy deur tswaters Element
Christe sonder vermincken
Ghy tooght hier wt excelent
Dat wy sijn een let bekent
Van u door tdoopsel soet
Eeuwigen lof sonder ent
Sy u mijn schepper soet
Om d'Elementen goet.
Lof bouen lof moet u aencleuen
Wech waerheyt ende leuen
Den troost van allen desolaten
Ghy hebt die duysterheyt verdreuen
Van dlicht/ en ons ghegeuen
Den claren dach tot onser baten
Lof die de Sonne schiept schoon bouen maten
Mane Sterrekens met groot ghetal
Lof God vol charitaten
Ghy gaeft hier ons menschen al
Dlicht dat eeuwich dueren sal
Die uwen wille doet
Danckbaerheyt in deertsche dal
Sy u mijn schepper soet
Om d'Elementen goet.
Noch moetick uwen lof vermonden
Mijn God tot allen stonden
Door tcrachtich werck by ons ghebleken
Want om dat wy cout sijn beuonden
Hebt ghy ons tvier ghesonden
Op datter niet en sou gebreken
Wie sal ten rechten dijn lof wtghespreken
Naer d'ionnen van u Elementen bloot
Noyt en heeft ons besmeken
Tvier van uwer liefden groot
Dwelck ghy beweest totter doot
Int storten van u bloet
Al den prijs die elck noyt boot
Sy u mijn schepper soet
Om d'Elementen goet.
Lof prince God niet om volprijsen
Die ons hebt willen spijsen
Door dbroot met dijn heylich lichame
Naer der Elementen wtwijsen
Oock sachmen dwater rijsen
Met bloet wt u sijde bequame
Lof leuende dranck voor ons aenghename
Die ons scheedt wter duysterheyt seer quaet
Lof licht dat tonser prame
Voor ons bidt als aduocaet
Lof vier dat niet wt en gaet
In wien elck branden moet
Glori inden hoochsten graet
Sy u mijn schepper soet
Om d'Elementen goet.
| |
|
|
Deuchdelijcke Solutien, gesolveert by vele ingenieuse Componisten van diversche Cameren van Rethorijcken. Duysent guldens, zilveren coppen en schalen, Met my te coopen meucht ghy winnen: U ghelt coemt inde Lothery' sonder falen, Goede stichtinghe vindy hier binnen. Dit is u prose ende Nombre net, Wilt dit bewaren in plaetse van u billet.
|
|
[1575]
|
| Amsterdam UB: 1998 C 11 |
| fEe7 |
|
| Transcriptie naar bron, diplomatisch. Door Alexandra Kecskés. |
|
