|
|
|
Dit liedekijn heeft ghedicht een Dominicus broeder, ende gaet op die wijse: 'Troeren moet ic nacht ende dach, ende lijde grot verlanghen'.
1 Druck heeft bevaen dat harte mijn
Van nu tot allen stonden,
Want my des werlts soet venijn
Soe dicwil treckt tot sonden.
Och Jhesus Heer, mijn vleis verbiet,
Mijn arme broesheit doch aensiet!
Die cap en maeckt die monick niet
Och Jhesus Heer etcetera.
2 Och, als ic in die werelt was
Soe leefde ic sonder sorge,
Mijn vruechde die wies ghelijck datgras
Van savonts tot die morghen.
Nu moet ic bliven int verdriet,
God gheef hem ramp mer diet my riet!
Die cap die maect die monick
3 [34v] Mi docht, ic soude al int habijt
Ghelijck en enghel leven,
Vrolijck wesen mit yolijt
Bij Goode sijn verheven.
Mer hoer doch vrienden, dit bediet
Die mensheit my niet achterliet.
Die cap en maect en monick niet
Mer hort etcetera.
4 Ic ben gheraeck al in dat strick
In Jhesus' net ghevanghen.
Als ic lach in der sonden strick,
Ghinck Hij die hant my langhen.
Al heb ic nu dus groot onthiet,
Nochtans wanneer ment wel doer siet:
Die cap en maect den etcetera.
5 Niet anders ben ic nu ghestelt
Dan als ic was te voren:
Dat vleisch dat doet my groot ghewelt
Daer ic mede bin gheboren.
Ic vecht altijt mit groter vlijt,
Ten baet niet wat ic put of ghiet:
Die cap en maect die etcetera.
6 Ic ben gheneicht ghelijck ic plach
Tot dansen ende tot springhen,
Van tsavonts totten lichten dach
Mit blider herten singhen.
Des werlts sop my noch beghiet,
Al nu met coude als nu met heet:
Die cap en maect etcetera.
7 Claer isser waer int openbaer:
Ten is gheen scheel te sterven
Slechts eenen doot, meer dach ende jaer
Die vryen wil te derven,
Seer weinich wist ic watter briet!
Al ben ic van Marien bevreet,
Die cap en maect etcetera.
8 Voersiet uw kans, beraet u wel,
Die u ter oerde wilt gheven:
Ten is voerwaer gheen kinderspel
Ghebonden hier te leven.
Die luysen sijn een vul ghediet
Het tsi int hempt of oppet cleet:
Die cap een maect die etcetera.
9 Sijt huysch van monde, Dat bid ic dij,
Die waerlijck sijt van leven.
Als jonghe herten worden blij
Tot vroechden hem ghaen gheven.
Ghec waer hij die hem daer aen stiet,
Want [xxi/35r] waerlijck sonderarsch ghesciet.
Die cap en maect die etcetera.
10 Mijn sinnen lopen noch seer wilt
Diet liedeken heeft ghemaeket;
En brootsack voert hij in sijn schilt
Die werelt heeft hij versaeket.
Hij hoert seer gheern en vrolick liet
Al is hij nu een paep ghewiet:Die cap een etcetera. | |
|
|
Handschrift Meerman
|
|
[1525 ca.]
|
| Brussel KB: II 2631 |
| f34r |
|
| H. Joldersma, naar bron, kritisch. |
|
