Nederlandse Liederenbank


Een oudt liedeken. WIe wil hooren een goet nyeu liet En dat sal ick ons singhen Al vander edelder minne Van een ridder ende ioncfrouwe Si droeghen verholen minne. Die vrouwe op hoogher salen sach Van also verre dat si sach Si sach hem van so verre Si sach hem comen ghereden Veel claerder dan een sterre Hi stack zijn hant onder zijn cleet Een vingherlinck was daer bereedt Dat worp hi inden rijn die vrouwe op haer sale lach Seer noode wou zijt verloren laten blijuen. Ende si had een cleyn vondel hont dat conste wel duycken tot inden gront So diep in ghenen gronde dat haelde haer dat vingherlijn In also corter stonden Doen si dat vingerlinc ontfangen hadde Ende si dat seer wel besach So stont daer in gescreuen. Och rijck heer god hoe salich hi waer Die lazarus mochte wesen Si ghinc voor haren vader staen Voor haren liefsten vader Siet vader ick moet v claghen Ic ben besmet met lazarie Ic moet wt alle mijnen maghen Och dochter sprac hi dochter mijn Hoe soude dat moghen ghezijn. Want ghi zijt also schoone Ende bouen alle lantsurouwen So spant ghi die croone Die vader al totter dochter sprac Och dochter wel lieue dochter mijn Hoe gaerne soude ic weten Waer v die leelike lazarije eerst wt sal breken Dat meysken dat niet laten en dorst Si nam een mes si cloofde haer borst Siet vader ic sal v bethoonen Si en condese daer na in seuen iaer Ghesuyueren noch gheschoonen Men ghinc haer daer een huysken maken Besiden des weechs al vander straten Men huerde haer eenen gheselle die haer al door die minne van god Soude clincken die lazarissche belle Daer in so lach si seuen iaer dat si noch sonne noch mane en sach Niet meer dan tot eenen tijde So liet si haer dore open staen Si sach den ridder comen rijden Si wiesch haer handen si waren schoon Si leydese opten sadel boom Si lieter die sonne op schijnen Doen kende hi dat vinghelijn Dat hi worp inden rijne Hi settese voor hem op zijn paert Hi voerdese tot sinen lande waert Hi cleedese al met gouwe Ten eynden vanden seuen iaer So was s des ridders vrouwe

Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
1544
Wolfenbüttel Herzog August Bibliothek: A: 236.5 Poet
f90r

DBNL/werkgroep Joldersma, naar bron, diplomatisch.