|
Een oudt liedeken
UErlangen ghi doet mijnder herten pijn
Al om te weten boelken oft icx v bade
Om troost om voetsel en medecijn
V liefde lieueken gaet mi te nade
Eylaes eylaes eylaes boelken ay mi.
Eylaes het moet gescheyden zijn
Ghelijck die roose wast op den doren
heb ick met vruechden mijnen tijt gheleyt.
daer ic voormaels was wtuercoren
Certeyn daer ist mi nv ontseit.
Eylaes eylaes eylaes mijn herte dat screyt
O doot coemt voor rasch en niet en beyt.
Ic hadde mi haer seluen ouer ghegeuen.
Te doene daer haren sin toe droech.
Mer quade tonghen die hebbent bedreuen
dat ic nv lijde dit ongeuoech
Eylaes eylaes eylaes ten is niet genoech.
Eylaes het scheyden coemt mi te vroech.
O lief die mijn herte doorknaecht
V minne doet mi so grooten pijn
Ic heb v so dicwils minen noot gheclaecht
Mer v driakel is moort ende fenijn
Eylaes eylaes eylaes adieu die liefste mijn
Eylaes het moet ghescheyden zijn
Mocht ick haer ter sprake comen
Als ic hier voormaels heb gedaen
Ic soudt haer loonen het soude haer vromen
Nemmermeer en soude icx haer afgaen
eylaes eylaes ic mach wel mijn handen slaen
Eylaes si heeft mi ontrou ghedaen
Troost begheer ick noch aen dy
Och hertelijck lief mocht mi gheschien
Mi en roecx in wat manieren dat si
Mocht ic v voortstel noch eens aensien
eylaes eylaes eylaes wat sal mijns geschien.
O doot coemt rasch ic sal v mi bien | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f86r |
|
| DBNL/werkgroep Joldersma, naar bron, diplomatisch. |
