|
Een oudt liedeken.
TYrannich werc vol archs gedronghen
mi en twifelt niet noeyt erger quaet
dat ic oyt was van venus discipels ionghen
Dat maect mijn herte al desperaet.
Ick hebbe v verloren mijn toeuerlaet
Ic en weet niet hoet gaet
Alleen so blijue ic boelken inder noot
Want trouwe is nv ter werelt doot
Alle mijnen druck moet ic nv ontbinden
Hoe wel mi tvermaen is leedt
Gheenen troost en can ic aen v gheuinden
Elders te soecken dat waer mi onghereedt
Noyt scherper snede mijn herte doorsneet
Och noeyt spere so wreet
Si heeft mijn herte heel dooruloghen
Ter eeren van v schoon lief so wil ict gedoogen
Gheen dinc ter werelt en dunct mi so fel
dat mijn ionc herte also seere deert
Als dat si met een ander bedrijft haer spel
die mijn ionc herte also seer begeert
Het is mijnder herten een snijdende sweert
Och ic bens onweert
dat ic die alderliefste moet wesen schou
des sterue ic thien duysentich dooden nv
Wee mi dat ic oeyt was gheboren
Ter droeuer tijt ic die werelt aensach
Dat ic moet deruen die ic heb wtuercoren
dat is mijnder herten een swaer gelach
Ic mach wel roepen o wy o wach
Ende bedrijuen geclach
Coemt doot haelt mi wten verdwijne
Want langer te leuen is mijnder herten pijne
Schoon lief als ic van deser werelt sal sceiden
Ende ghi met eenen anderen doet v geuoech
Segt doch eens god wil zijn siele geleyden
Hebbe ic also vele tis mi genoech
die noeyt dat pack van minnen en droech.
Oft en trock die ploech
der ialousien in swaer verdriet
Ic rade v voor tbeste sidyer niet en coemter niet. | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f84r |
|
| DBNL/werkgroep Joldersma, naar bron, diplomatisch. |
