|
Een nyeu liedeken
IC hadde een gestadich minneken.
Geen scoonder die daer leeft
Vercoren in mijn sinneken.
Van rouwe mijn herte beeft
Want si mi nv begheeft
daerom mach ic wel scriuen
Wantrouwe van alle wijuen.
Want si een ander heeft
Twee bruyn ogen so draget si
So vriendelic int gesicht.
daer mede so veriaget si
druck lijden int gewicht.
Tis lange te voren gedicht
Tis lange te voren geschreuen
Dat si mi soude begheuen
Want vrouwen woorden die zijn lichte.
Soete weerde lieueken
Peyst somtijts eens om mi
doet vry al v gherieueken
Al sonder fantasi
Seer selden ben ic bly
Weder ic ete oft drincke
Om v ist dat ic dincke
Al wijsdi mi voor by
Hoe soude ic haer vergeten.
Ic ligghe in swaer verdriet.
Van drincken noch van eten.
Can ic gheuoeden niet
Ick weet wel hoe si hiet
Die mijn herteken heeft beuanghen.
Naer haer staet alle mijn verlanghen
Ic leue in swaer verdriet
O venus soete vrouwe
Is dat v dienaers loon
Int eynde van v trouwe
So ist beghinsel schoon
Dies sterf ic duysentich doon
dat haer een ander sal trouwen.
Die bloem van alle vrouwen
Al onder des hemels troon
Adieu mach ic wel scriuen
Adieu is mijn aduijs
Bedroghen moet ic blijuen
Als Salomon die wijs
Die schole van Parijs
Absalon die schoone
Schoone vrouwen spannen die croone
die geue ic den hoochsten prijs
O bitterlijcke scheyden
Waer toe sidy ghemaect
Die doot wil mi verbeyden
die also bitter smaect
het moet ghescheyden zijn
Schoon lief staet mi te spraken
Ick valle in desperaten
Ic bliue al in die pijn | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f56r |
|
| DBNL/werkgroep Joldersma, naar bron, diplomatisch. |
