|
Een oudt liedeken.
IC stont op hoogen bergen
Ic sach ter zee waert in
Ic sach een scheepken drijuen
Daer waren drie ruyters in
den eeuen stont in minen sin.
Den alder ioncsten ruyter
die in dat scheepken was.
die scanc mi eens te drincken.
Den wijn wt een glas
God loons hem die dat was
Ick brenghet v cleyn haueloos meysken.
Ghi zijt van hauen bloot
Om dat ghy een cleyn haueloos meysken zijt.
daer om ick v laten moet
Ghi en hebter ia gheen goet
Ben ick een cleyn haueloose meysken
Ick en bens alleyne niet
In een cloosterken wil ic rijden
God loons hem diet mi riet
dat ic wt alle genoechten sciet
Och ioncfrou nonne als ghy te clooster gaet
Ende als ghi wijnge ontfaet
Hoe geerne soude ick weten
Hoe v die nonne cleyder staen
als ghi in een clooster wilt gaen
Mer doen si in dat clooster quam
haer vader die was doot
Men vant in al mijns heren lant
geen rijcker kint ende was groot
Ende niet van hauen bloot
Den ruyter had so haest vernomen.
Hi sprac sadelt mi mijn paert.
dat si int clooster is gecomen
Dat mijnder herten so sere deert
Het is mi wel rijdens waert
Mer doen hi voor clooster quam
Hi clopte aen den rinc.
Waer is dat ioncste nonneken
Dat hier lest wijnge ontfinc
Het is so schoonen kint
Dat alder ioncste nonneken
En mach niet comen wt.
Si sidt al hier besloten
Ende si is Iesus bruyt.
Si looft hem ouerluyt
Dat alder ioncste nonneken
Ghinc voor den ruyter staen
Haer hayrken was afgescoren
Die minne was al ghedaen
Nonne cleederen had si aen
Ghi moecht wel thuyswaret rijden.
Stout ruyter ghi moecht wel gaen.
Ghi moecht een ander verkiesen
Mijn minnen is al ghedaen.
Ick hebbe een ander leuen aenghegaen.
Doen ic een cleyn haueloos meysken was.
doen stiet hi mi metten voet
Om dat ic ionc ende arm was
Ic en hadde doen gheen spoet.
Stelt nv te vreden uwen moet. | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f50r |
|
| DBNL/werkgroep Joldersma, naar bron, diplomatisch. |
