|
Van fier Margrietken
HEt soude een fier Margrietelijn
Ghister auont spade
Met haren canneken gaen om wijn
Si was daer toe verraden
Wat vantse in haren weghe staen
Eenen ruyter stille
Nv segt mi fier margrietelijn
doet nv mijnen wille ia wille
Vweu wille en doen ic niet
Mijn moerken soude mi schelden
Storte ic dan mijnen coelen wijn
Alleyne soude ic hem ghelden
En sorghet niet voor den coelen wijn
Mer sorghet voor v seluen.
Die waert is onser beyder vrient
Hi sal ons noch wel borghen
Hi namse in sinen witten armen
Heymelick al stille
Al in een duyster camerken
Daer schafte hi doe sinnen wille
Smorgens ontrent der middernacht
Si ghinc haer kanneken soecken
Daer lach die moeyaert ende hi loech
Het staet daer teynden mijn voeten
Mer dat daer teynden v voeten staet
Dat sal v noch lange berouwen
Ic hebbe noch drie ghebroeders stout
Si sullen v dat hooft af houwen
Alle v ghebroeders stout
Die sette ick in mijn deeren
Ick sal alle dese somer lanck
Met Grietken houden mijn scheeren
Ende hi nam eenen snee witten bal
Hi stackse al in haer kele
Hi schootse tot eenderen veynsteren
Hi schootse al in die dijle
Teghen stroom quam si gedreuen wt
Aen sint Ians cappelle
Dat sach so menich fijn edel man
So menich ionc gheselle ia gheselle | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f40r |
|
| DBNL/werkgroep Joldersma, naar bron, diplomatisch. |
