|
Vanden ruyter wt Bosschayen.
HEt quam een ruyterken wt Bosscayen
Ghister auont inden wijn
Ou segt ou en salmen hier niet naien
Ick hebbe geschuert mijn hemdekijn
Noch hebbe ick eenen gulden fijn
Die sal ic v meysken gaerne gheuen
Wildy tauont mijn boelschap zijn
So sal ick met v vrolijck zijn
Teghen den den wint come ick gheseylt
Als een dye scheeps hem niet en verstaet.
Ghi en hebt gheen sinnekens aen mi geleyt.
Mi dunct ghi hebt mijns lieuer verlaet
Na dat nv aldus met mi gaet
So wil ick maken een goet verdrach
Een ander te kiesen is mijnen raet
Adieu dien ick te minnen plach
Schutterkens die den boghe hantieren
Coopen twee pesen tot haren boghe
Breken si deen na tspeels manieren
Si stellen een ander ten seluen toghe
desghelijcx wil ick te doene poghen
Want vrouwen sinnekens zijn als stof.
Ghelijc den wint quaemdy mi aengheulogen
Hier mede schoon lief neme ic oorlof
Och lieue ghesellen ick moet v claghen
Ghi moet mi gheuen goeden raet
Ick ben ghecomen in Venus plaghen
Ic en weet wat mi te doene staet
Mijn hope mijn troost mijn toeuerlaet
Heeft mi begheuen ende seer onwaert
Dies is mijn herteken so seer beswaert
Mer tsop en is der koolen niet waert
Hi stelt zijn herteken in swaerder sorghen
Die zijn sinnekens aen vroukens lecht
Want hi hanget altijt sonder worghen
Als een die strijt ende niet vecht
Wient ick claghe ic hebbe onrecht
Altijt so gaet si haren padt
Si en heeft gheen sinnekens aen mi gheleyt
Al blijue ick in drucke wat acht si dat
Die dit liedeken eerst heeft ghesongen
Dat was een ruyterken van ghelde bloot
En hadden ghedaen quade nijders tonghen.
Hi lagghe zijn liefken in haren schoot
Daer hi toe droech zijn liefde groot
Die en mach hem gebueren tot gheender tijt
Hi had hem geholpen wt zijnder noot
Mer quade niders tongen geeft hi die wijt | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f39v |
|
| DBNL/werkgroep Joldersma, naar bron, diplomatisch. |
