|
Een nyeu liedeken.
EEn goet nyeu liet heb ick gedicht
Met also droeuen sinne.
Die liefste heeft mi daer toe gesticht
Met haerder looser minne
Ic en sal haer nemmermeer af gaen
Bi daghe noch bi nachte
Si cost mijn herteken so menighen traen
Al heeftse mi nv ontrou ghedaen
Noch staetse in mijn gedachte.
Noyt roose soet van soeter rueck
En heeft mijn herteken so seer beuangen.
Al hebbe ick somtijts quaet gheluck
Naer haer staet mijn verlanghen
Rijc god mocht noch eens anders gaen
En mochte den tijt noch keeren
Dat ic mocht troost van haer ontfaen
So soude ic allen druck verslaen
Ende altoos vruecht vermeeren
Met een die alder liefste mijn
So ghinck ic vermeyden
Ick en mach altoos bi v niet zijn
Wi twee wi moeten scheyden
Si hout mijn herteken so seer doorwont
Hoe soude ick vrolijck wesen
Dat heeft ghedaen haren rooden mont
Mocht ick dien cussen ic waer ghesont
So waer mijn herteken ghenesen
Altijt staet si in mijn vermaen
Ende al wt goeder duechden
Mocht ic noch troost van haer ontfaen
So waer mijn herte in vruechden
Mer neen ick niet ic blijue alleyn
Ende si heeft mi begheuen
Si is nochtans dat liefste greyn
Kiese ick dit iaer noch twee voor eyn
So mach ick vrolijck leuen
Oorlof schoon lief alst wesen moet
Ende ick wil henen varen
Ick bidde maria maghet soet
Dat si ons wil bewaren
Mijn sinnekens hadde ick op v ghestelt
Schoon lief ist al verloren
Ick minde v bouen goet oft ghelt
Mi dunct dat v mijn vrientschap smelt
Adieu mijn wtuercorren
Mer die dit liedeken eerstwerf sanck
Dat was een ruyters gheselle
Hi weets hem allen goeden danck
Die duecht van hem ende van zijn boel vertellen
Met schoone vroukens sidt hi op die banck
Te biere oft te wijne
Al is zijn borsse dicwils cranck
Laghe hy in zijns boels armkens blanck.
Het waer zijnder herten een medecijne | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f21r |
|
| DBNL/werkgroep Joldersma, naar bron, diplomatisch. |
