|
Een nyeu liedeken.
DEs hadde een swaue een dochterlijn
Si en woude niet langher dienen.
Rock ende mantel woude si haen
Twee schoenen met smale riemen
Ia schoon isser mijn Elsselijn
Des wildy rock ende mantel haen
Twee schoenen met smale riemen
So gaet Tausborch in die stadt
Ende groote heeren dienen
Ia schoon isser mijn Elsselijn
Doen si Tausborch binnen quam.
Al op die enghe straten
Si vraechden na den besten wijn
Daer ruyters ende lantsknechten saten
Ia schoon isser mijn Elsselijn
Doen si inder stouen quam
Men brochte haer eens te drincken
Si liet haer ooghen omme gaen
Den beker liet si sincken
Ia schoon isser mijn Elsselijn
Si namen die terlinghen inde hant.
Si begonnen daer te spelen.
Die daer die meeste ooghen worp
die sliep bider schoonder vrouwen
Ia schoon isser mijn Elsselijn.
Hi nam schoon Elsselijn bider hant
Bi haer snee witte handen
Hi leyse daer hi een beddeken vant
dat groene wout ten eynde
Ia schoon isser mijn Elsselijn
Hi sette haer neder op die banc
Si en dede niet dan weenen
Noch hebbe ic stoute broeders drie
eenen rijcken vader tsoheyme
Ia schoon isser mijn Elsselijn
Dats hebdy stoute broeders drie
eenen rijcken vader tsoheymen
So moechdy dit iaer een huerlinc zijn
eenen rijcken vader tsoheyme
Ia schoon isser mijn Elsselijn
Mer doen si opter gassen tradt
Haer bekende hare broeder
Och suster sprac hi suster mijn
Hoe is die reyse verganghen.
dat den roc vore corter is
ende achter veel te langhe
Ia schoon isser mijn Elsselijn
Och broeder sprac si broeder mijn
du riedeste mi aen mijn eere
Hadde mi dat een ander ghedaen
Hi soudes mi wederomme keeren.
Ia schoon isser mijn Elsselijn
Die dit liedeken eerstwerf sanc
Hi heuet geerne ghesonghen
Een vroom lantsknecht is hi genaemt.
Tausboorch binnen der stede
Ia schoon isser mijn Elsselijn. | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f16v |
|
| DBNL/werkgroep Joldersma, naar bron, diplomatisch. |
