|
Een nyeu liedeken.
COnfoort confoort sonder verdrach.
Mijn liefste boel verborghen
Ic segge vry ten is noch gheen dach.
Ten is noch gheenen morghen
Die wachter singhet zijn daghelijcx liet
Hi can zijn tonghe wel bedwinghen
Coemt in huys mijn soete lief
Wi twee wi sullen noch genoechte beginnen
Si leyde hem op haer borstkens ront
daer op so ghinck hi ligghen rusten
Si seyde schoon lief mijn waerde mont
Wat dinghe mach v lusten
Si leyde hem in haer armkens vry
Van vruechden began therte ontspringhen
Bedect mijn eere dat bidde ick dy
Bedect mijn eere lief bouen alle dinghen
Dat bidde ick v o liefste mijn
die alderliefste suldi blijuen
daer twee goede lieuekens vergadert zijn
Hoe noode laten si hem verdrijuen
Waer mi Virgilius conste cont
den lichten dach soude ic vertrecken
Ende mijns liefs witte borstkens ront
daer mede sal ick vruecht verwecken
Ay lacen neen ick niet
den dach die coemt ick moet vertrecken
Lief van mi vliet lief van mi vliet
dat ons die nijders niet en beghecken
Die ons dit liedeken eerstwerf sanck
Vrou venus liefde hem seer quelde
Hi was geerne op vruechden banck
daer hi hem wel toe stelde | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f8v |
|
| DBNL/werkgroep Joldersma, naar bron, diplomatisch. |
