|
Een amoreus liedeken.
ADieu reyn bloemkens rosiere.
die mi bi uwer duecht
V wesen ende v maniere
Mi dicwils heeft verhuecht
Peyst om mi als ghi moecht
Als ick trecke wten lande
Mijn hert laet ic v te pande
Adieu solaes ende vruecht
Adieu ghi doet mi smerte
Adieu noyt meerder grief
Adieu mijn iongedom herte
Berooft mi als een dief
Adieu mijn liefste lief
Als ick ben wter stede
Ic bidde v om een bede
Leest daghelijcx desen brief
Alstu den brief hebt gelesen
Ghi doet mi liefs genoech.
wilt doch gedachtich wesen
die eens tot v minne droech
ic en sal v spade noch vroech
Schoon lief ooc niet vergeten.
Mer herteken ic laet v weten
dat noyt pacxken also swaer en woech
Wilt v doch eerlic draghen
Ende peyst doch om den endt.
Want nv en tallen daghen.
Blijft ghi in mi geprent
This god die therte kendt.
scoon lief wilt daer op dencken
Mijn bloet sal ic v schencken
Mijn hert voor een testament
Dat wi nv moeten scheyden
This mi een swaer pijn.
Christus wil v gheleyden
Tmoet al ghescheyden zijn.
Mer ic hope in corte termijn
Spijt alle dese nijders treken
wi sullen malcander noch spreken
Ende drincken den coelen wijn
Adieu princesse gepresen
This al om v ghedaen
Wilt doch gedachtich wesen
Want ic moet van v gaen
God die wil v bistaen
Schoon lief coemt mi te baten.
Dat ic v nv moet laten
dat cost mi so menigen traen. | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f6r |
|
| DBNL/werkgroep Joldersma, naar bron, diplomatisch. |
