|
Een nyeu liedeken
ALle mijn gepeys doet mi so wee
Wien so sal ick claghen mijn verdriet
die liefste en acht op mi niet meer
Eylacen wat is mi geschiet
Ic mach wel segghen tis al om niet
dat ick aldus labuere
Dies wil ic singhen een vrolick liet
Verlanghen ghi doet mi trueren
Moet ic nv deruen die liefste mijn
So moet ic trueren tot inder doot
Haer eerbaer wesen haer claer aenschijn
dat brengt mi nv in lijden groot
Helpt mi schoon lief wt deser noot
En wilt mi daer niet in laten
Wat ic vermach schoon roose root
dat coemt v al te baten
Die goede ghestadige minne draecht
Ende daer hi dan wort bedroghen
Voor Gode moet dat zijn gheclaecht
Met twee beweenden ooghen
Men mach wel segghen tis grote pijn
diet minnen niet en can ghelaten
Nochtans coemt hem al inden armen zijn
Sijn lief tot zijnder baten
Gaef si mi nv een troostelijck woort
So waer mijn trueren al ghedaen
Mer lacen neen si noch gheen confoort
En can ic van die alderliefste ontfaen
Dat sal mi costen menighen traen
Mach ic gheenen troost van haer verweruen.
Schoon lief wilt mi in staden staen.
Van rou so moet ic anders steruen
Dat goede ghestadige minnaers zijn
Wacht v van quade tongen
Si zijn veel arger dan fenijn.
Dan quade slangen iongen
Want daer dese nijders zijn versaemt
Si en connens niet ghedogen
Al en doetmen anders nyet dant wel betaemt
Si aensient met valschen oghen
Dese nijders zijn argher dan fenijn
Dese quade valsche clappaerts tonghen
Als si vruecht aensien dat doet hem pijn
Si hebbent haest ghesonghen
Ic mach wel segghen droeuen schijn
Ende claghen bouen maten
Daer om so truert dat herte mijn
der nijders valsche daden
Dit is ghedaen om drucx verslaen
Met cleynder conste so ist begonnen
Ia dit vermaen wilt wel verstaen
dit wil ick die minnaers ionnen
Planteyt van ghelt in zijn gewelt
Sijn lief tot zijnder eruen
Vry onghequelt mijn vruechde smelt
die liefste moet ick deruen | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f2r |
|
| DBNL/werkgroep Joldersma, naar bron, diplomatisch. |
