|
|
|
Een Scheydliet op die wyse Lieff wtvercoren
Door fantasyen / vindt ick myn jeucht
In droeuich lyen / en ongeneucht
Dies ick my quelle / want ick sal nu
Madamoiselle / scheyden van v
In vreemde lants gaen / van nu voortaen
Wandelen gaen / daer ick my seer voor gru
Hoe sal ick moghen / nemen verdrach
Als vwer ooghen / lieffelyck opslaen
My niet beschynen / voerwaer ick smelt
En sal verdwynen / als sneeu opt velt
Wie salder dan syn / die welcke myn
van druck en pyn / sal maecken ongequelt
Ick sal ontberen / v gracyeus
soet colloqueren / en amoreux
geclanck van woorden / seer eloquent
die ick aenhoorden / soude ontrent
ick claecht den dach / o wee o wach
dat v soet gelach / van my sal syn gewent
O patiency / hoochweerdich cruyt
In s'liefs absency / mildelyck spruyt
in mynder sinnen / affeckt[e]ys aert
daer tvier der minnen / hem openbaert
op dat myn hert / door druck en smert
dan niet en wart / te jamerlyck beswaert
Naest Godt almachtich / die t'al regeert
syt ghy waerachtich / van my geert
ende wt pure / liefde bemint
geen creature / is so besint
in al myn gedacht / tis lieffden cracht
die met eendracht / dit fondament begint
Adieu Princesse / myn lieffste lieff
schoonste matresse / tsherten gerief
godt wil v spaeren / met gesontheyt
een lanck weluaeren / tot salicheyt
al ben ick apsent / myn hert is ontrent
en tot den endt / t'vwen dienste bereyt | |
|
|
Album amicorum van Aefgen Claesdochter van Giblant
|
|
1598-1600
|
| Den Haag KB: 135 K 36 |
| f40v |
|
| Willem Kuiper, naar bron, diplomatisch. |
|
© 2025 KNAW/Meertens Instituut
