|
|
|
Een nieu may liet op die wyse
den lustelicken may
Den mey compt ons lieffelyck aen
den baen / wert nu betreden / vter steden
van minnaers die daer buyten gaen
seer saen / volcht haer lieff mede / meest in vrede
met harpen luyten / soet geclanck
vyolo[noen] fluyten / ende sanck
ouer die schoon groen heye
met desen coelen meye
Daer gaen geliefkens hant aen hant
opt lant / lanckx der reuieren / so playsieren
beuanghen met der Liefden brandt
playsant / daer al de dieren / den mey cieren
de viskens in het waeter soet
spelen daer met een bly gemoet
in die selue valeye
met desen coelen meye
Die veldekens staen abondant
geplant / met bloemkens reyne / int gemeyne
d'amoreusen seer tryumphant
valyant / na die fonteyne / in dat pleyne
treden sy dan / paer ende paer
menich Iongman / met syn lief daer
sy plucken d acoleye
daer in den coelen meye
Menich bloemken staeter gebloeyt
daer groeyt / in die lantsdouwe / menich kersouwe
zynde met shemels dou besproyt
oock vloyt / het waeter nouwe / schoon Ionckurouwe
Phebus geeft alle cruyden cracht
Aurora vochticht dach ende nacht
tgewas is menigerleye
met desen coelen meye
Ghy Princelycke minaers hoort
treedt voort / condyse vinde / v beminde
maeckt met v tween een accoort
oorboort / als wel gesinde / onder een linde
so amoreusen schuldich syn
wilt vwen tyt geduldich zyn
wie dan dat hy verbeye
tot in den coelen meye | |
|
|
Album amicorum van Aefgen Claesdochter van Giblant
|
|
1598-1600
|
| Den Haag KB: 135 K 36 |
| f12v |
|
| Willem Kuiper, naar bron, diplomatisch. |
|
© 2024 KNAW/Meertens Instituut
