|
|
Gheldeloze volghet mi Wi willen zinghen een vroylic liet So wie dat riker es dan wi Die nes van onsen lieden niet Maer wie altoos na vruechden spiet Die es van onser compaengie Wanneer hi drouvelike up mi ziet So wetic wel hoe hem ghescie
Ghebrec van gelde ende scamelheit Dat doet ons toghen drouve gelaet Want als een wellecome zeit De .ij. de .iij. die segghen gaet So wie gelt heift elc na hem staet Al cant ons lieden niet gheburen Dus dinct mi sijn de beste raet Vroilic leven sonder truren
Sorgheloos ende zonder nijt Dats tbeste dat men zinghen mach Cuenwi duerbringhen dus den tijt Beter dinc ic nie ne zach Laetse trueren nacht ende dach Die tgelt besluten in haer scrine Noch eist beter ghelts verdrach Dan altoos zonder vruecht te zine
Heer god al sijn wi aveloos Verleent ons vruecht in onsen zin Ende hoet ons vor de vrec altoos Die niet ne geert dan gelt ghewin Ende hoet mi dat ic niet ne bin Int huus ghelet van enigher boete Daer men roupt ter buerch waert in Soet soete gheraerts soet soete soete | |
|
Gruuthuse-handschrift
|
1390 - 1400
|
Koolkerke (thans Den Haag) |
f19r |
|
Johan Oosterman en Corrie de Haan, naar Heeroma 1966 en bron, diplomatisch. |
|
© 2024 KNAW/Meertens Instituut