|
|
|
ΒΆ Een schoen ghyestelick lyedeken/ vant bedroch der valscher Werldt Op de wijse. Ey olde Grijsaert.
Ick heb die Werldt seer bemint
Sy heft my heel van Godt getoge
Nv heb icket oock al versint
Hoe my die werldt heeft bedroghen
O Godt het is in v vermoeghen
Wilt my nv ontfermen noch
O valsche Werlt ghi hebt my al gelogen
In v en is niet dan bedroch.
O Werldt ghi zijt toch een partije
Tegen Godt het is claer beseuen
Want nijdicheyt ende houerdije
Zijn ter werlt al verheuen
Nyemant en soeckt dat eeuwich leuen
Dat mach ick wel segghen noch
O valsche werlt ick heb v al beseuen
In v is niet dan bedroch.
Gulsicheyt ende ouerdaet
En zijn ter Werldt nv al ghien sonden
Ouerspeel seer fornicaet.
Al zijn sy oock ouer al gheuonden
Dit en achtmen voer ghien sonden
Dat mach ick wel segghen noch
O valsche Werlt/ als ic v wel doergronde
In v en is niet dan bedroch.
Als ick die Werldt wel besie
En bekenne haer ghebreken
Laet ons dan tot Christum vlien
Ende die werldt heel versteken
In hem en sals ons niet ghebreken
Want hy is der menschen soch
O valsche werldt ick heb v al doerkeken
In v en is niet dan bedroch.
O hemelsche Vader ghebenedijt
Wilt my van dit vleysch verlaten
Dat wy doer Christum worden beuriet
Want wy zijn al broesche vaten
Die Werldt mit haren ondersaten
Heft my beuanghen noch
O valsche werldt ten mach v niet baten
In v en is niet dan bedroch.
O Vader inder eewicheyt
Wilt my uwen ghyest in gheuen
Die werldt heeft my heel verleyt
Sy doet my na den vleysche leuen
Het welcke brengt die siele int sneuen
Verloren inder hellen crocht
O valsche Werldt ick heb v claer beseuen
In v en is niet dan bedroch. | |
|
|
Campen, Joannes M.,
Dat Boeck Salomonis Ecclesiasticus op Duyts den Predicant ofte Leeraer ghenoemt. Doer den hoochgheleerden M. Joannem Campensem, [...] overgeset, en claerlick uutgelecht
|
|
[1550 ca.]
|
| Den Haag KB: 1708 E 6-4 |
| fC7r? |
|
| Martine de Bruin, naar bron, diplomatisch. |
|
