|
|
|
[xviii/33r] Dit is een suverlijc ghestelijc lyedeken van denheilighe apostel Sinte Pauwels, ende heeft twee wijsen. Die een is: 'Ic hoerde een wilt voghel singhen'.Ende die ander wijse is: 'Ter Maes al op den Rijn, daer woent een'.
1 Laet ons suetelijken singhen
Van eenen wijnghertranck:
Van Paulo willen wi dat beghinnen,
Hoe Hi die heeft gheplant.
Sijn ranken heeft Hi wijt ontloken
Tot onser aller vroom;
Apollo heeftse wel begoten,
Godt heeft ghegeven wasdoem.
Tot onser aller etcetera
2 Ic en derf my niet vermeeten,
O gloriose licht,
Van Dij enich lof te spreken
Of te maken enich ghedicht.
Ghij sijt soe hoech ghepresen,
Vercoren int harte mijn;
Wilt ons die rechte wech wijsen
Dat wij moghen comen bij Dij.
Vercoren etcetera
3 Een bloem is op gheresen,
Van verwen is Hij claer;
Een licht seer hoech ghepresen
Doet ons die Scrift ontwaer.
Hoe subtijlijken datmen lesen,
In Sijn exsempelen openbaer,
Ten mach niet scoenre wesen,
Dat seg ic u voerwaer.
In Sijn exsem etcetera
4 Loeflijck tot Uwer eeren,
Sijt ghenoemt een vat
Van Jhesum Onsen Heren,
Dat Ghij sout draghen Sijn scat.
Een vat van Gode vercoren
Te draghen Sijnen naem,
Soe wast versien tevoren
Alst namels soude gaen.
Te draghen etcetera
5 Hoech sijt Ghij verheven
Hier boven in Hemelrijck;
Doe Ghij opter aerden leefde
Wie sach ie des ghelijck?
In den derden hemel hoghe
Al by die Triniteit,
Die scout Ghij mitten oghen
Als ons die Scriftuer seit.
Al bij die Triniteit etcetera
6 Hoe stoutelijc hebt Ghij ghedraghen
Jhesus, die soete naem,
Menichwerf om Hem gheslaghen
Ende oeck den doot ontfaen.
Daerom sijt Ghij verheven
Hier boven in Hemelrijc;
God wil ons graci gheven
Dij te dienen ewelijck.
Hier boven etcetera
7 [33v] O licht, seer hoech ghepresen:
Mit recht voer Ghi die naem,
Ghi hebt ons die wech ghewesen
Ende hebts ons voer ghegaen.
Die heylighe kerck is van U gheresen,
Dat doet men ons wel verstaen;
Glorij hebt Ghij vercreghen,
Daerom wast U ghedaen.
Dat doet men etcetera
8 Veel claerer dan die sonne
Sijt Ghij, dat is wel aenschijn;
Hoech sijt Ghij gheclomen
Al boven cherubin.
Ghij hebt die strijt ghewonnen,
Die victori is U ghebleven;
Daerom sijt Ghij gheclomen
Hier boven int ewich leven.
9 Wilt ons niet vergheten,
O uutvercoren vat!
Hoech sijt Ghij gheseten.
Wijst ons den rechte pat,
Dat wij moeghe ghenaken
Die glori der ewicheit.
Och mocht wij daer gheraken
Soe hadden wijt wel beleit!
Die glori etcetera
10 Daerom soe wilt Ghij troeren
Hebt altijt goeden moet:
Ghij sijt langhe te voren
Mit Jhesus Christus bloet,
Van des viants banden
Soe sijt Ghij uutgheleijt,
Tot hoerre alre scande
Ende tot onser salicheit.
Soe sijt etcetera
(1) Laet ons suetelijken singhen | |
|
|
Handschrift Meerman
|
|
[1525 ca.]
|
| Brussel KB: II 2631 |
| f33r |
|
| H. Joldersma, naar bron, kritisch. |
|
