|
Een oudt liedeken
RIick god hoe mach dat wesen
Dat ic dus droeuich ben
Ic hadde een wtgelesen
So vast in mijnen sin
Ic en can haer niet vergheten
Hoe seere dat icx mi pijn
Wat wil ic mi vermeten
Druck moet mijn eyghen zijn
Schoon lief ick sou v vraghen
Woudijt in duechden verstaen.
Sal ic noch langer iagen
Eer ic v sal connen gheuaen
Ic hebbe v wtuercoren
Al in dat herte mijn
Segt mi salt zijn verloren
Druck moet mijn eyghen zijn
Gheselle wel lieue gheselle
Segt mi tot deser tijt
Hoe dorst ghi mi vertellen
Dat ghi in drucke zijt
Al hebdy mi wtuercoren
Wat weet ick uwen gront.
Mach v wat goets gebueren
weest huesch in uwen mont
Schoon lief conste ic vercrigen
Van v een troostelijc woort
mijn kniekens sou ic buygen
Voor v alst wel behoort
Seer stille soude ict draghen.
Al in dat herte mijn
Wat baet dat ic veel claghe
Druc moet mijn eygen zijn.
Geselle ghi zijt seer schoone van woorden
Bedroch is v gheleert
Gelijc den wint van noorden
Sidy van mi ghekeert
men mach v niet betrouwen.
Dat segghe ic v goet ront
Begheerdy wil van vrouwen
Sijt huesch in uwen mont
Schoon lief wilt goelijc wesen
antwoort mi niet te fel
Ic heb dicwils hooren lesen
Dat twee liefkens namaels maken spel
Ic hope den tijt sal keeren
Al schiet ghi v fenijn
Nochtans wil ic v eeren
Al soude druc mijn eygen zijn
Geselle ghi sout v scamen
dat ghi mi dus dic vermaent
Ghi gaet al door die bramen
den wech is onghebaent
die ghi beghint te treden
Och wiste ick uwen gront
Ic waer noch badt te vreden
waerdi huesch in uwen mont
Schoon lief laet ws gedincken
so menigen swaren sucht.
die ic v plach te schincken
Ende al wt goeder duecht
Ter straten ende ter kercken.
Als ic sach v blide aenschijn
Hebdijs niet willen mercken
So moet druc mijn eygen zijn.
Gheselle v soete woorden
Die gaen int herte mijn
mer oft also ghebuerde
dat water worde wijn
Ende ghi mijn minne cost crigen
waer v dat niet een vont
Soudy wel connen swijghen
Ende huesch zijn in uwen mont.
Och ia ic reyn vrouwelijc wesen
Van v heb ict geleert
so waer minen druck genesen
wes ghi op mi begeert
och mocht mi dat volcomen.
V lieflijc blijde aenschijn
En derf ic mi nyet beromen
Druck moet mijn eygen zijn
Geselle laet v niet verlangen
Leeft voort op goeden troost
men leyt so menigen geuangen
die namaels wert verlost
Weest huesch tot alle tijden.
En maect dat niemant condt
Trou suldi aen mi vinden.
Sijt huesch in uwen mont.
Ic dancke v venus minne
Van uwer duechden groot.
god laet mi trou aen v vinden
Helpt mi wt deser noot
V vriendelijc aenschouwen.
doet mijnder herten pijn
o reyn natuere van vrouwen
Laet vruecht mijn eygen zijn
Geselle wilt vruechde bedrijuen
Als nv tot deser tijt
Ic wil v vruecht toescrijuen
Mijn herte hebdy verblijt.
Al met vrou venus strale
hebdi mijn herte doorwont
V eyghen ben ic altemale.
Weest huesch in uwen mont
Vrouwen eere mach ic wel scriuen
Wes mach mi aen gaen
Een bloeme bouen alle wijuen
die heeft mi troost ghedaen
Mijn trouwe is mi geloont.
Vaert wech mijnder herten pijn
Mijn druc derf mi niet rouwen
Vruecht sal mijn eyghen zijn
Ter eeren van alle vrouwen
So is dit het ghemaect
men loont so die met trouwen
Daerom ist dat wel betalen.
Men mach wel eere bewisen
schoon vrouwen op elc termijn
cost ic troost van haer vercrigen
druck soude vergheten zijn | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f77v |
|
| DBNL/werkgroep Joldersma, naar bron, diplomatisch. |
