|
Een oudt liedeken.
MEt luste willen wi singhen Schoon lief al bider hant Van drie lantsheeren dingen Geboren wt nederlant. Cleue Hoorne ende Batenborch Haer namen zijn wel becant Met sanghe willen wijse prijsen Gaen wandelen al door dat lant
Die heeren zijn wt ghetogen Al in dat gulden iaer Si en wouden niet weder keeren Si en waren ridder geslaghen Te Venegien dat si quamen Si maecten een verdrach Si en wouden niet weder keeren Si en besochten dat heylighe graf
Si namen daer malcander Al bider witser hant Wi rijden nv te samen Al door dat gulden lant Si saghen int suytwesten Al dat vergulden iaer Mer si waren vreemde gasten Te Ierusalem was haer begaer
Die een heere sprack den stierman toe Hout uwen ancker al vast Bewaert v schip met staden Siet wel tot uwen mast Ghi hebt drie heeren gheladen Het en is om gheen ghelt te doen Bewaer v schip van schaden Dat ons gheen ghebrec en coem
Schip roer ende prouanden Alle dinck is wel ghestelt Nv stieret van den landen Al in des gods gewelt Voor wint ende ooc voor waghe dat meyr is onghewelt Wi willen vrolijck waghen Het ghelt ons euen dier
Si seylden voor den wint Ende ooc al voor die waghen Te Ierusalem aen dat lant Salomons tempel dat si saghen Si traden te Ierusalem Al op dat heylich lant Si traden op dat heylich graf Daer maria so innich op lach
Ghi heeren sidy daer om comen dat ghi ridders wilt gheslaghen zijn Hout uwe scharen baren Ende laet den coopman varen Ende voert dat sweert met recht Ende beschermt weduwen ende weesen So voert ghi een goet recht Nv hebt ghi edelheyt ghecreghen. | |
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
1544
|
Wolfenbüttel Herzog August Bibliothek: A: 236.5 Poet |
f61v |
|
DBNL/werkgroep Joldersma, naar bron, diplomatisch. |