|
Van Thijsken vanden schilde
HEt is goet vrede in alle duytsce landen Sonder Thijsken vanden schilde Hi leyt te Delder gheuanghen Hi leyt gheuangen so swaerlijck op zijn lijf
Die vrou al vanden scilde si lach op hooger tinnen. Si sach die heeren die borghers comen binnen. Si en sach daer Thijsken haer liefste boele niet Si en sach daer. etc
Ghi ruyters ghi rouers ghi heeren vander straten Waer hebdi Thisken vander schilde ghelaten Waer hebdi gelaten die liefste boele mijn Waer hebdi. etc.
Och vrouken vanden schilde Nv en laet v niet verlanghen. Dat Thijsken vanden schilde te Delder leyt gheuanghen. Hi leyt. etc.
Dat vrouken vanden schilde en woudes nie gheloouen. Si dede haer paerdeken sadelen ende toomen. Si reedt te Delder al voor dat hooghe huys Si reedt. etc
Och Thijsken vanden schilde dats bistu nv hier binnen. So steect v hoofdeken al wt der hoogher tinnen Laet mi aenschouwen v fiere ionghe lijf Laet mi. etc.
Thijsken vanden schilde en liets hem niet verdrieten Hi liet zijn hoofdeken ter hooger tinnen wt schieten. Hi liet haer aenschouwen zijn fiere ionghe lijf. Hi liet. etc
Thijsken vanden schilde ghi en wout my niet gheloouen Dat ghi bi daghe by nachte soudt laten v ruyten v roouen Dat ghi soudt laten v roouen ter haluer middernacht Dat ghi. etc.
Ia vrouken vanden schilde dat quam by uwen sculden Dat ghi wout draghen dat siluer ende root gulden Dat ghi wout draghen dat roode beslaghen gout Dat ghi. etc.
Och Thijsken vanden schilde haddy dat woort ghesweghen Met siluer ende roode gout had ick v op doen weghen Dat v nv sal costen dijn fiere ionghe lijf dat v nv sal costen. etc.
Och vrouken vanden schilde en soude v dat niet verdrieten. dat mi die rauen die voghelen souden eten Dat mi souden eten so menic clein vogelken dat mi souden eten. etc.
Och Thijsken vanden schilde en laet v niet verlanghen Ick sal v radeken met rooskens ombehanghen Daer op sal rusten dijn fiere ionge lijf Daer op etc. | |
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
1544
|
Wolfenbüttel Herzog August Bibliothek: A: 236.5 Poet |
f35r |
|
DBNL/werkgroep Joldersma, naar bron, diplomatisch. |