|
Een amoreus liedeken
ALs alle die cruydekens spruyten
Ende alle dinc verfrayt
Ick wil mi gaen vermuyten
Ick ben mijns liefs te buyten
Het compas gaet al verdrayt.
Tis recht schoon lief ic bens ontpaeyt.
Hebdy v boel verloren
Wat schaden hebdy daer van
Ick seyt v van te voren
Een ander had ic vercoren
daer leyt v seer luttel an
Al kiest ghi een ander man
Wat schaedt den rijm der roosen
Ghi veleyn door uwen hals
Ghi waert die eerste glose
die mi brochte in nose
dus leere ic nv van als
vlaems spaens duyts ende wals
God groete v schoon kersowe
Ghi snijt mijn herte ontwee
Ghi zijt die liefste vrouwe
Aen v staet mijn betrouwen
Int lant en ouer de zee
En leuen nv geen lieuer twee
V lof v danck v waerde
Neme ick nv een verdrach
Ic weet een ander op aerde
Een edel man te paerde
een rijckaert diet wel vermach
die vrijt mi nacht ende dach
Vrijt v een man teenen boele
Een ruyter oft een baroen
Wacht v dat hi niet en coele
Want gheuoelde hi dat ick gheuoele
Hi en sou niet gaen aendoen
Een anders mans oude scoen.
Adieu wel vuyl clergersse
Tis meer dan scheydens tijt
Al ist dat ick nv messe
Ick leerde v die eerste lesse
Trouwen ick kent ick lijdt
Bouen alle die werelt wijt | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f1v |
|
| DBNL/werkgroep Joldersma, naar bron, diplomatisch. |
