|
|
|
Op de wijse, Ick seg Adieu.
LAet ons ghemeen,
Met vreuchde triumpheren
[fol. 37]
Droefheyt vertreen,
Soet quelen jubileren,
Die zijn vergaert in dese feest
En laet ons singen onbevreest
Minst ende meest // In dit foreest
Dees Vrysters teer ter eeren.
Hier is den Most
Gheschoncken in Goude schalen
Denckt niet wat cost
Ons Waert die salt betalen
Elck dien' die hy vercoren heeft
Dat ghy hier vint te voren gheeft
Om niemant beeft // Maer wilt beleeft
Gheneucht en vreucht voorthalen.
Ghelijck seer fray,
Die Rooskens staen en bloeyen,
Omtrent den May
Soo zijn wy nu int groeyen
Daerom ghebruyckt heel vry v ieucht,
Singt en springt hanteert gheneucht,
Gheschickte deucht // ter wijl ghy meucht
Den tijt sal ons besnoeyen.
Princen ontrent,
V Lief seer fier gheseten,
V oochgens went // na haer als elc sal eten,
V liefd altijt eerlijck bedeckt
Vrolijck geneucht en vreucht verweckt
Speelt lockt en geckt // siet wat ghy spreckt
En wilt droefheyt vergeten. | |
|
|
Nieu: Amstelredams Lied-boeck, vol Amoreuse nieu Jaren, Mey-Lieden, Tafel Lieden, en veelderhande vrolijcke ghesangen, Nu op nieu vermeerdert
|
|
1591
|
| Gent UB: BL 7099 (2) |
| p36 |
|
|
|
